Zbatimi i reformës territoriale – Bashkitë, funksione të reja në shërbim të qytetarëve

Rritje e funksionalitetit të bashkive, ulja e kostove administrative, rritje e eficencës dhe cilësisë së shërbimeve. Kjo është ajo që ka mundësuar vënia në zbatim e reformës administrativo – territoriale. Gjatë një inspektimi në qytetet e Fierit dhe Tepelenës, vihet re se bashkitë e reja kanë një përmirësim të ndjeshëm të qendrave të qyteteve, ku ndryshimet janë të dukshme.

Aktualisht për 31 bashki janë miratuar planet e reja të rregullimit të territorit, ndërsa edhe 11 bashki do t’i mbyllin në 2017. Por krahas qyteteve, kompetencat e bashkive tashmë janë shtrirë dhe po investojnë për herë të parë në shërbime për zonat rurale, të cilat prej vitesh vuajnë mungesën e financimeve.

Ndarja e re territoriale i dha fund fragmentimit të skajshëm administrativ të vendit, duke reduktuar numrin e njësive të qeverisjes vendore nga 384 në 61 bashki. Kjo sipas Çuçit bëri decentralizimin e kompetencave nga qeveria qendrore tek ajo vendore.

Sipas tij, përmirësimi i legjislacionit për financat vendore do të mundësojë gjithashtu edhe të ardhurat për bashkitë. Kjo reformë krahas mbështetjes nga fondet e qeverisë shqiptare po mbështetet edhe nga donatorë të rëndësishëm si UNDP, nëpërmjet projektit, STARS 2.

Por realizimi i saj do vazhdojë edhe me projekte të  tjera të rëndësishme si dixhitalizimi i arkivave të bashkive dhe ofrimi i shërbimeve në çdo bashki përmes zyrave me një ndalesë.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.