Zbutet recesioni i ekonomisë – Bie me 3.47% në TIII, turizmi dhe taksat “zhysin” PBB, ndërtimi dhe real estate e mbajnë gjallë
Prodhimi i Brendshëm Bruto i vendit është tkurrur me 3.47% në tremujorin e tretë të vitit, tregojnë të dhënat e fundit nga instituti i statistikave. Pavarësisht se bëhet fjalë për një tkurrje të ekonomisë, ritmet e saj janë ndjeshëm më të ngadalta se tremujori paraardhës, kur rënia fiksohej në masën -10.2%. Ndikimin më të madh negativ në tkurrjen e ekonomisë shqiptare gjatë tremujorit të tretë të vitit e ka dhënë aktiviteti i “tregtisë, transporti dhe akomodimit e shërbimit ushqimor”, paçka se periudha i referohet kulmit të sezonit turistik.
Edhe aktivitetet profesionale si dhe taksat neto kanë dhënë një kontribut negativ në rritjen ekonomike të vendit. Ndërtimi dhe aktivitetet e pasurive të paluajtshme nga ana tjetër, kanë dhënë një kontribut pozitiv në rritjen e prodhimit të brendshëm bruto me baza vjetore, tregojnë të dhënat. Sa i përket ecurisë së degëve kryesore të ekonomisë gjatë tremujorit të tretë të vitit, pikërisht tregtia bashkë me akomodimin dhe ushqimin, regjistrojnë rënie të ndjeshme, në masën 13%. Edhe aktivitete profesionale regjistrohen në rënie me rreth 16%.
Argëtimi ka pësuar gjithashtu një tkurrje në thuajse 10% me baza vjetore. Ndërtimi dhe aktivitetet e pasurive të paluajtshme ndërkohë, janë në “boom”. Nga të dhënat e fundit vihet re gjithashtu se bujqësia ka humbur hovin e tremujorit të dytë, kur në kulmin e pandemisë ishte një nga dy degët e vetme të ekonomisë në rritje. Tashmë është në stanjacion. Konsumi final i popullatës ndërkohë regjistrohet në rënie prej 3.86% krahasuar me të njëjtën periudhë të vitit paraardhës. Një tjetër e dhënë që vihet re është ajo se sektori financiar dhe i sigurimeve regjistrohet në një rritje prej rreth 31% gjatë tremujorit të tretë të vitit, krahasuar me tremujorin e dytë, duke qenë kështu sektori me rimëkëmbjen më të madhe nga pandemia.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.