“Zëri”: Cilat janë 7 kandidatët për kryeministër në Kosovë! Surprizon LDK-ja

Edhe pse nuk dihet se kur do të mbahen zgjedhjet e reja, disa prej partive politike në Kosovë kanë caktuar kandidaturat për kryeministër. “Zëri” shkruan se për PDK-në kandidaturë kryesorë për kryeministër është kryetari i partisë Kadri Veseli. Përfaqësuesit e AAK-së kanë thënë se kreu i këtij subjekti Ramush Haradinaj do të emërohet si kandidat për kryeministër.

Ndërkohë, Albin Kurti është sërish kandidat i kësaj fore për kryeministër ndryshe nga sa ndodh me LDK-në që ende nuk është përcaktuar kandidatura.

“Në këtë subjekt janë dy figura kyçe që po përfliten për pretendues të postit të kryeministrit. Disa brenda LDK-së po e mbështesin nënkryetarin Lutfi Haziri e disa të tjerë deputeten Vjosa Osmani” shkruhet në artikull.

Ndërkohë, Nisma ka si kandidat Fatmir Limajn.  Ndërkaq deputeti i PSD-së Salih Salihu ka thënë se nëse PSD-ja hyn e vetme në zgjedhje duhet ta propozojë kryetarin e partisë Shpend Ahmetin si të nominuar për kryeministër.

“Por në momentin që organizohen zgjedhjet e reja disa prej këtyre kalkulimeve të partive mund të bien në ujë në rast se ato garojnë nëpërmjet koalicioneve, pasi partitë të cilat zgjedhin të bashkëpunojnë mes vete në koalicion duhet të bien në ujdi që ta përzgjedhin vetëm një kandidat për kryeministër” evidentohet në artikull.

Artikulli i plotë: https://zeri.info/aktuale/279284/kandidatet-potenciale-per-kryeminister/

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.