Zero luftë ndaj kequshqyerjes – Raporti 2018, jo progres në objektivat globale dhe as plan masash nga qeveria

Raporti Global i Ushqyerjes për vitin 2018 arrin në përfundimin se shqiptarët vuajnë nga tre forma kequshqyerje: mbipesha, anemia dhe ndalimi i rritjes.

Por ajo që duket më shqetësuese është fakti se, vendi ynë nuk ka përmbushur asnjë nga 9 objektivat global të ushqyerjes për vitin 2018. Në 5 prej këtyre kategorive ndërkohe mund të ketë edhe përkeqësim, por e pamundur të vlerësohet.

Ajo që mund të thuhet me siguri është që nuk ka progres. Këto 5 kategori janë: anemia, obeziteti te meshkujt e rritur, obeziteti te femrat e rritura, diabeti te femrat e rritura dhe diabeti te meshkujt e rritur.

Të asnjë nga këto kategori nuk ka progres. Në 4 kategoritë e tjera që i referohen problematikës dhe rrjedhojave të kequshqyerjes te fëmijët ka mungesë të dhënash. Por, raporti ndër të tjera thotë se, nuk ka një plan kombëtar për të luftuar këto pasoja të kequshqyerjes, pasi vetëm një prej këtyre elementëve, që është mbipesha te të rriturit është e përfshirë në planet e masave kombëtare nga qeveria shqiptare. Të tjerat as nuk parashikohen fare, paçka se janë objektiva globale.

Kjo do të thotë se lufta ndaj kequshqyerjes në Shqipëri, të paktën nga shteti, është thuajse inekzistente. Të dhënat nga i njëjti raport, i publikuar vetëm pak kohë më parë, tregonin gjithashtu se shqiptarët kanë një dietë aspak të shëndetshme, me mungesa bazë, si frutat apo ushqime të pasura me omega 3, si dhe mbi konsumim të mishit, pijeve me sheqer dhe gaz, si dhe kripërave.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.