Zero TVSH për kooperativat – Halilaj: Të nxisim bashkëpunimin në shitje dhe prodhim
Fermerët që do të bashkohen në Shoqëri të Bashkëpunimit Bujqësor, nuk do të jenë pjesë e skemës së TVSH-së. Ministria e Bujqësisë ka propozuar që kjo ngarkesë fiskale që kanë pasur deri më sot këto njësi, të hiqet, për nxitur bashkimin e fermerëve. Në një intervistë për TV SCAN, zv.Ministri i Bujqësisë, Ilir Halilaj thekson se mjafton që bashkëpunimi të jetë vetëm në prodhim dhe në shitje, dhe për të krijuar një Shoqëri, duhen minimalisht 7 anëtarë.
Deri më sot, fermerët individualë, ishin të përjashtuar nga deklarimi i TVSH-së deri në pragun 5 milion lekë.
Aktualisht funksionojnë 25 Shoqëri të Bashkëpunimit Bujqësor dhe xhiro vjetore totale llogaritet në rreth 25 milion lekë. Bashkimi në kooperativa do të sillte më pak kosto administrative për fermerët, mundësi më të larta për të përfituar fonde nga skemat subvencionuese si dhe mundësi për të qenë përfitues të lehtësive të tjera që mund të ndërmerren nga Ministria e Bujqësisë. Vendimi pritet të miratohet në mbledhjen e radhës të qeverisë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.