Zgjedhjet 2017, kreu i KQZ Zguri: Zgjedhësit të dalin masivisht në votime, sot është dita e tyre!

I pari që ka çelur procesin e votimit për zgjedhjet parlamentare të 25 qershorit ka qenë kreu i KQZ-së, Klement Zguri, i cili në orën 07:00 votoi në Qendrën e Votimit 1730/1, pranë Liceu Artistik. Pas procesit të votimit, në një prononcim për mediat, Zguri u bëri thirrje qytetarët të marrin pjesë masivisht në zgjedhje.

“KQZ në një kohë rekord, brenda kërkesave të ligjit ka bërë gati përgatitjet e zgjedhjeve që sot shqiptarët të votojnë të lirë dhe sipas vullnetit të tyre. Vetë demokracia është votë dhe pjesëmarrje, shqiptarët sot kanë mundësinë për të bërë demokraci. U bëj thirrje zgjedhësve të dalin masivisht në votim, është e drejtë kushtetuese e patjetërsueshme dhe sot është dita e tyre. Zgjedhje të zhvillohen me transparencë dhe komisionerët ta ushtrojnë me paanshmëri detyrën e tyre”, tha Zguri.

Osman Dedja/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.