Zgjedhjet në Katalonjë – Separatistët fitojnë mazhorancën në votimin rajonal, goditje për Rajoy
Mbështetësit e pavarësisë pritet të rifitojnë pushtet në rajonin e pasur të Katalonjës pas zgjedhjeve lokale ditën e Enjte, duke thelluar krizën politike të Spanjës.
Me të gjitha votat e numëruara, partitë separatiste fituan mazhorancën në parlamentin e Katalonjës, një rezultat që do të zgjasë tensionet politike që kanë dëmtuar ekonominë spanjolle dhe larguar bizneset nga rajoni.
Tre grupet separatiste morën 70 vende nga 135 duke rikthyer mazhorancën që humbën në muajin Tetor, kur Kryeministri Spanjoll, Mariano Rajoy përdori neni 155 të kushtetutës për të shkarkuar administratën përpara se të hynte në efekt deklarata për pavarësinë.
Rajoy, i cili bëri thirrje për zgjedhjet pasi shkarkoi qeverinë e mëparshme, shpresonte që “mazhoranca e heshtur” e Katalonjës t’i jepte një goditje mbështetësve të pavarësisë. Rezultati i papritur i hap rrugën rikthimit në fuqi të presidentit të shkarkuar Carles Puigdemont.
Votimi i ditës së djeshme trazoi edhe tregjet globalë, duke sjellë rënien e lehtë të euros dhe përkeqësuar humorin në tregjet e kapitalit. Më shumë se 3,100 firma kanë zhvendosur bazat ligjore jashtë Katalonjës, me frikën se rajoni do të shkëputej nga Spanja dhe do të falimentonte.
Spanja ka ulur projeksionet për rritjen për vitin që vjen dhe të dhënat zyrtare tregojnë se investimet e huaja direkte në Katalonjë ranë me 75% në tremujorin e tretë, krahasuar me të njëjtën periudhë një vit më parë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.