Zgjedhjet në Kosovë, Prishtina dhe Prizreni shkojnë në rinumërim votash
Paneli Zgjedhor për Ankesa dhe Parashtresa (PZAP) ka vendosur që të rinumërohen votat në të gjitha vendvotimet e Komunës së Prishtinës dhe të Prizrenit.
Fillimisht, kërkesën për rinumërimin e votave në Prishtinë, e kishte paraqitur Lidhja Demokratike e Kosovës, ndërsa rezultatin e zgjedhjeve në Prizren e kishte kontestuar Partia Demokratike e Kosovës.
Kryesuesi i Sekretariatit të Panelit Zgjedhor për Ankesa dhe Parashtresa (PZAP), Mulë Desku tha për Radion Evropa e Lirë se rinumërimi vjen si pasojë e parregullsive gjatë numërimit.
“Për shkak të parregullsive që janë identifikuar, Paneli ka marrë vendim për rinumëruar të gjitha vendvotimet në Komunën e Prishtinës dhe Prizrenit”, tha Desku. Në garë për kryetar të Prishtinës, janë Shpend Ahmeti i Lëvizjes Vetëvendosje dhe Arban Abrashi nga Lidhja Demokratike e Kosovës.
Në bazë të rezultateve paraprake, por të cilat pas vendimit të Panelit Zgjedhor për Ankesa dhe Parashtresa nuk do të vlejnë më, kandidati i Vetëvendosjes, Shpend Ahmeti printe me vota në Prishtinë, me një epërsi jo të madhe.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.