“Zgjedhjet për 6 Bashki pa mitingje e grumbullime” – Rama: Sa më pak politikë, kokë më kokë me njerëzit. Në prill, një president normal
Në situatën e pazakontë të krijuar për shkak të përplasjeve në radhët e opozitës, Kryeministri Edi Rama i ka kërkuar strukturave të Partisë Socialiste të përqendrohen në zgjedhjet për gjashtë bashki vetëm te hallet dhe interesat e qytetarëve. Në takimin me grupin Parlamentar ai tha se në fushatë do të përfshihen vetëm drejtuesit vendorë, deputetë, drejtues politikë, pa mitingje e grumbullime të mëdha, por punë “kokë më kokë” me njerëzit.
Rama i parapriu edhe një sfide tjetër në muajin prill, për zgjedhjen e Presidentit të ri. Ai tha se për emrin që do zëvendësojë Ilir Metën në krye të shtetit do të pyetet populli, duke nënvizuar se vendit i duhet një President normal.
Kreu i Qeverisë u ndal gjatë te procesi i Këshillimit me publikun, duke e quajtur inkurajues duke parë se deri tani mbi 23 mijë qytetarë u janë përgjigjur pyetësorëve.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.