Zgjerimi i Eurozonës – Rumania i bashkohet Bullgarisë dhe Kroacisë në planet për adaptimin

Tre vendet më të varfëra të Bashkimit Europian po synojnë tashmë adaptimin e euros.   Lajmërimi i fundit vjen nga Rumania, që bëri të ditur gjatë javës së kaluar se do të paraqesë strategjinë deri në fund të këtij viti, duke rikthyer një ide që braktisi në 2015-ën.

Vendi bashkohet me Bullgarinë dhe Kroacinë, që po nisin rrugëtimin drejt anëtarësimit në valutën e përbashkët. Kjo përpjekje mund të mbështesë afrimin e vendeve të Ballkanit drejt qendrës së Bashkimit Europian, ndërkohë që janë ngritur dyshime mbi shpërndarjen e fondeve të rëndësishme të zhvillimit për të ardhmen.  Ndërkohë që Brexit përfundon, qëndrimi jashtë Eurozonës mund të sjellë në veçimin e vendeve anëtare.

Sipas analistëve, plani i buxhetit të Bashkimit Europian, i jep më shumë prioritet vendeve të Eurozonës. Planet e këtyre tre vendeve bëjnë kontrast me vendet më të pasura ish-komuniste.

Ndërkohë që Sllovenia, Sllovakia, Estonia, Letonia dhe Lituania përdorin euron, Polonia, Republika Çeke dhe Hungaria nuk kanë ndonjë plan për të ndjekur këtë rrugë. Eksperienca e Greqisë mbi përfundimin e politikave monetare të pavarura, ka lënë gjithashtu shije të hidhur.

Megjithatë, për vendet më të varfëra të Bashkimit Europian, fondet e zhvillimit mund të duhen për të ardhmen. Përgatitjet e Bullgarisë janë më optimiste. Vendi më i varfër i Bashkimit Europian, që mban presidencën e radhës, ka fiksuar levën me euron dhe kërkon t’i bashkohet këtë Verë mekanizmit të kursit të këmbimit, që është periudha 2-vjeçare përgatitore për adaptimin e valutës.

Kroacia kërkon të zëvendësojë valutën në 5-7 vite ndërsa Rumania, nuk ka prezantuar ende datën objektiv. Rumania kërkon të rrisë produktin e brendshëm bruto për frymë në 70% të mesatares së Eurozonës deri në 2020-ën, nga 60% që është aktualisht, sipas programit të fundit të konvergjencës.

“Caktimi i një date ekzakte të adaptimit të euros kërkon një analizë të detajuar të konvergjencës strukturore dhe institucionale”, bëri të ditur Qeveria.

Ndërkohë që Bullgaria përputhet me kriteret dhe liderët në Gjermani dhe Francë kanë treguar mbështetje, Banka Qendrore Europiane është treguar skeptike pas skandaleve financiare në Europën Lindore. Samiti mbi të ardhmen e Bashkimit Europian pas Brexit, që do të mbahet në Pranverën e ardhshme në Rumani, mund të hedhë më shumë dritë te perspektivat e vendeve.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.