Zgjerimi i tregut financiar – Do të rriste punësimin në sektorit privat

Punësimi në vendet e Ballkanit Perëndimor u rrit me ritme të ngadalta vitin e kaluar. Sipas Bankës Botërore, kjo dëshmon një dinamizëm të dobët të sektorit privat në rajon, përfshi këtu Shqipërinë. Një nga problemet është aksesi i kufizuar në kreditim, çka shtron edhe njëherë nevojën për diversifikimin e burimeve të financimit dhe sidomos zhvillimin e tregut të kapitalit.

I pyetur nga Tv Scan, Keler Gjika, ekspert për tregjet financiare në Korporatën Financiare Ndërkombëtare, pjesë e Bankës Botërore, thotë se është e rëndësishme të rritet aksesi i biznesit në financim, sidomos për bizneset e vogla dhe të mesme, që janë një shtyllë e rëndësishme për punësimin në ekonomi.

Në raportin e fundit për tendencat e tregut të punës në vendet e Ballkanit Perëndimor Banka Botërore konstatoi një ngadalësim të ndjeshëm në rritjen e punësimit vitin e kaluar. Kreditimi i shtrënguar është një ndër faktorët që frenon rritjen e aktivitetit të biznesit dhe punësimit. Në modelin e ekonomive më të zhvilluara, nevojitet krijimi i një kanali alternativ financimi, përmes bursës dhe instrumenteve financiare që ajo mundëson.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.