Zgjidhet Bordi i Akreditimit për arsimin e lartë. Drejtuesja e re, profesore e asociuar në ‘Sussex University’ dhe ‘London School of Economics’
Bordi i Akreditimit i Agjencisë së Sigurimit të Cilësisë në Arsimin e Lartë përbëhet nga 11 anëtarë që u përzgjodhën mes 117 kandidaturash nga brenda dhe jashtë vendit, shqiptarë e të huaj.
“Me një falenderim të përzemërt për të gjithë kandidatët që iu përgjigjën pozitivisht ftesës së Ministrisë së Arsimit, Rinisë dhe Sportit, jam i bindur se falë kësaj pjesëmarrjeje përtej çdo pritshmërie, do të kemi një superskuadër ndërkombëtare në mbikqyrje të cilësisë së universiteteve tona” shkruan kryeministri në rrjetet sociale ndërsa njofton përfundimine procesit të përzgjedhjes.
Shqiponja TELHAJ është zgjedhur kryetarja e re e Bordit të Akredimit. Ajo është profesore e asociuar në Sussex University në Angli dhe kërkuese shkencore në Qendrën për Performancë Ekonomike në London School of Economics. Ka doktoruar në Staffordshire University. Ka publikuar 32 artikuj dhe raporte me fokus zhvillimin e politikave të arsimit të lartë, të botuara në revista e gazeta prestigjoze ndërkombëtare. Ka kontribuar si këshilltare në Ministrinë e Arsimit të Anglisë kryesisht në fushën e sigurimit të cilësisë në arsim.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.