Zgjidhet ngërçi në akuakulturë – Kristo: Subjekteve që u ka skaduar leja do vijojnë punën
Subjektet që zhvillojnë aktivitet në sektorin e akuakulturës por që u ka skaduar leja apo po u përfundon afati së shpejti, do të lejohen të vijojnë normalisht veprimtarinë deri në përfundimin e studimit që do të përcaktojë zonat e përshtatshme për zhvillimin e akuakulturës. Ky është thelbi i projektligjit të ri të prezantuar në Komisionin Parlamentar të Veprimtarive Prodhuese.
Ndërkaq, afati për përfundimin e këtij studimi ështe tejkaluar me disa muaj. Por zv.Ministri përgjegjës për këtë sektor, shpjegon arsyet dhe thekson se deri në fund të 2019-ës, gjithçka do të jetë gati.
Gjatë vitit 2018 prodhimi nga akuakultura ka qenë rreth 5500 ton nga 3 mijë ton që është regjistruar në 2016-ën. Bëhet fjalë kryesisht për kultivimin në ujëra të kripura dhe të ëmbla të midhjeve, peshqve të llojeve kocë, levrek dhe troftë. Miratimi i këtyre zonave do t’i japë një hov tjetër zhvillimit të sektorit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.