“Zgjidhje” për ngërçin në Bovillë – Hyn në fuqi vendimi, sipërfaqja e tokës që përfitohet nga familjet e shpërngulura
Nëpërmjet një vendimi të posaçëm qeveria ka miratuar sipërfaqen e tokës që përfitohet pa pagesë nga familjet e shpërngulura si pasojë e ndërtimit të Ujësjellësit të Bovillës.
Vendimi është miratuar para pak kohësh nga Këshilli i Ministrave, ndërkohë që ka hyrë në fuqi me botimin e tij në Fletoren Zyrtare, ku në ndryshimin e bërë në pikën 7 të vendimit Nr. 828, datë 23.11.2016, thuhet se “Sipërfaqja e truallit që përfitohet, pa pagesë është sipas evidentimit faktik në terren, deri në masën e 500 metrave katrorë”.
Vendimi i mëparshëm i vitit 2016, thoshte se kalimi i së drejtës së pronësisë mbi truallin dhe ndërtimet e subjekteve të shpërngulura nga ndërtimi i Ujëmbledhësit të Bovillës, kryhet, pa pagesë, sipas listave të hartuara në bazë të vendimit nr. 85, datë 2.3.1994, të Këshillit të Ministrave, “Për vënien në dispozicion të zonave të banimit për familjet që shpërngulen nga Ujëmbledhësi i Bovillës dhe ato që kanë ndërtuar pa leje përreth qytetit të Tiranës.
Titulli i pronësisë për objektin dhe truallin fitohet nëpërmjet lejes së legalizimit, e cila është e vlefshme për regjistrim në regjistrin e pasurive të paluajtshme. Procedurat për dhënien e lejes së legalizimit kryhen sipas gjendjes ndërtimore faktike, të evidentuar në terren, përfshirë ndryshimet apo shtesat informale të realizuara në objekt”, thuhet në vendim.
“Bovilla”, legalizim falas për 400 familje të shpronësuara
Kuvendi ka shqyrtuar më parë në seancë plenare nismën e qeverisë shqiptare që zgjidh problematikën e pronësisë për rreth 400 familje të shpronësuara nga projekti i ujësjellësit të Bovillës në Tiranë. Ngërçi u krijua në vitin 1994 kur këto familje u shpronësuan për realizimin e projektit edhe pse ndërtimet e tyre ishin informale dhe u zhvendosën në një zonë tjetër. Pavarësisht zhvendosjes së familjeve që iu shembën ndërtesat, edhe ndërtimet e reja paraqiten me të njëjtën problematikë, pasi ato janë kryer përtej projektit të miratuar për strehimin e tyre.
Projektligji nuk do të sjellë të ardhura apo shpenzime shtesë në buxhetin e shtetit. Subjektet, që do të përfitojnë prej tij, nuk do të ngarkohen me pagesat që lidhen me kalimin e pronësisë mbi truallin dhe objektin, pasi pronat e poseduara prej tyre kanë qenë të parashikuara si shpërblim për humbjen apo shpronësimin e shkaktuar nga ndërtimi i Ujëmbledhësit të Bovillës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.