“Zgjidhje për problemet e qytetarëve” – Rama në Fier: Njësitë administrative do t’i kthejmë në njësi shërbimi

Kryeministri Rama, në turin e dëgjesave publike, është ndalur sot në qytetin e Fierit. Problemet e pronave, të administratës dhe ato në bujqësisë kanë qenë pjesë e diskutimeve, pas ankesave të ngritura nga qytetarët. Gjatë fjalës së tij, kryeministri tha se 90% e problemeve të krijuara nuk lidhen me buxhetet, por lidhen me shtetin, me sjelljet e papërgjegjshme të administratës për të ofruar shërbime ndaj qytetarëve.

“90 për qind e problemeve nuk lidhen me buxhet, por lidhen me shtetin, lidhen me shërbimet që ofrohen. Një pjesë e problemeve janë të thjeshta, të cilat janë krijuar nga sjellja dhe papërgjegjshmëria e administratës, një pjesë e problemeve nuk janë aq të lehta, si problemi i konflikteve të pronësisë, i titujve të pronësisë, të cilat shpesh herë të ngatërruara për shkak të batërdive që janë bërë me pronën për shumë e shumë vite”, tha kryeministri Rama.

Në këtë dëgjesë publike, Rama foli edhe për problemet që lidhen me bashkitë dhe qytetarin, ku theksin e vuri në ndryshimin e qasjes në njësitë administrative, ku sipas tij ato do të kthehen në njësi shërbimi për zgjidhjen e problemeve.

“Një pjese e problemeve janë ato që lidhen me bashkitë dhe individët. Në këtë aspekt kemi çfarë mësojmë, për të ndryshuar qasjen e njësive administrative, të cilat do të jenë njësi shërbimi për zgjidhjen e problemeve. Kemi kaluar nga komuna te njësitë administrative dhe nuk kemi ulur numrin e personave që shërbejnë në këto njësi, na është rritur edhe kostoja financiare për shkak të një politike të gabuar, është rritur numri i punonjësve në shtet, dhe kjo nuk është përkthyer në shërbime. Njësitë administrative do të kthehen në pika shërbimi të rëndësishme për qytetarët. Shumë probleme mund të zgjidhen te njësia administrative, brenda një dite. Nuk do të jetë e lehtë, ne kemi një sfidë të madhe, në radhë te parë t’i gjejmë punës së shtetit, njeriun, jo t’i gjejmë punë një njeriu që nuk e bën punën, pasi ai do të shkatërronte punën për shumë të tjerë. Çdo bashki i ka kaq kapacitete që duhen për të pasur një administratë të përgjegjshme”, tha kryeministri.

Sa i takon çështjes së pronave, Rama përsëriti se nuk do të ketë më Komision Pronash, Hipotekë apo zyra legalizimesh, por do të kemi një institucion të quajtur Agjencia Kombëtare e Titujve të Pronësisë që do të regjistrojë pronat në të gjithë Shqipërinë dhe do të japë hipoteka, brenda 30 minutave.

Kryeministri iu ka kujtuar edhe një herë qytetarëve koalicion të madh që do të krijohet me njerëzit e zakonshëm, duke thënë: “ T’i japim mundësi qytetarëve për një koalicion real, jo propagandë. I japim mundësi çdo njeriu të zakonshëm të bëhet pjesë e qeverisjes”, u shpreh Rama.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.