‘Zhdukja’ e CO2 me rreze dielli dhe tallash: Transformon gazin serrë në produkte të dobishme!
Covid, bllokimet dhe zonat e kuqe nuk mjaftuan: sipas Organizatës Botërore Meteorologjike, viti 2020 ishte një vit rekord për CO2, pavarësisht një reduktimi prej 5.6% të konsumit të karburantit fosil. Dhe duke pasur parasysh se çdo teknologji e re e zhvilluar për të reduktuar emetimet e gazeve serrë tregon ndikime të rëndësishme vetëm në periudhën afatmesme dhe afatgjatë, është e rëndësishme që kërkimi të drejtohet drejt zhvillimit të proceseve që ndihmojnë në largimin e CO2 tashmë të pranishëm në atmosferë.
Një rezultat interesant në këtë drejtim është marrë nga një ekip studiuesish kinezë: Yapei Wang dhe kolegët e tij nga Departamenti i Kimisë i Universitetit Renmin kanë zhvilluar në fakt një metodë të re për kapjen e CO2 që përdor rrezet e diellit dhe tallashin për të transformuar gazin serrë në produkte të dobishme të tilla si etanoli, metanoli dhe metani. Shkencëtarët mbarsën tallashin me një zgjidhje të bazuar në ujë dhe amin, një molekulë organike që përmban azot, duke rezultuar në një material me kosto të ulët, i aftë për të thithur CO2.
Pasi të jetë shteruar aftësia për t’u lidhur me CO2, tallashi mund të rigjenerohet thjesht duke e ngrohur atë. Kështu, studiuesit bashkuan një panel absorbues me një panel diellor të modifikuar, në mënyrë që të merrnin një sistem plotësisht të gjelbër të kapjes së CO2. CO2 i hequr nga atmosfera mund të përdoret gjithashtu për prodhimin e metanolit dhe gazeve të tjera sintetike, të cilat nga ana tjetër mund të përdoren për prodhimin e energjisë.
Studimi u botua në numrin e fundit të Green Energy & Environment. Është një revolucion i vogël por interesant: sistemet e zhvilluara deri më tani për largimin e CO2 nga atmosfera janë në fakt veçanërisht intensive për energji, dhe për këtë arsye kanë një ndikim jo të papërfillshëm në bilancin neto midis CO2 të kapur dhe CO2 të emetuar gjatë procesit të largimit. FCS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.