Zhvillimi ekonomik – Kule: Bashkëpunimi akademik me Kinën, në Drejtësi dhe Ekonomi
Universiteti i Tiranës do të forcojë bashkëpunimin kulturor dhe akademik me institucionet akademike të Kinës. Drejtuesit e dy fakulteteve atij Ekonomik dhe Drejtësisë gjatë një simpoziumi mbi reformat e Kinës i kërkuan ambasadës Kineze mbështetje për të vijuar në këtë proces me specialistët e ardhshëm duke deklaruar se ekonomia e qëndrueshme duhet të mbështetet në legjislacion të qëndrueshëm.
“Këmbimi i kulturave, i përvojave është një nevojë e domosdoshme për të progresuar dhe marrja, mësimi i kulturës, i sjelljes, i menaxhimit që transmetohet nga Kina është një akses shtesë për tërë ekspertët, specialistët, ekonomistët dhe të gjithë fushat e tjera të vendit tonë.”
“Po të jetë se nuk ka legjislacion të qëndrueshëm, ekonomia nuk është e sigurtë në zhvillimin e saj. Ne kemi dëgjuar së fundmi për reformën në drejtësi, pa një garanci të dhënies të së drejtës, çdo gjë ecën në një terren jo të sigurt, ekonomia, zhvillimi i vendit.”
Ambasadorja Kineze Jiang Yu theksoi gatishmërinë për të bashkëpunuar .Yu bëri një ekspoze të politikave që ka ndjekur Kina si superfuqia e dytë në botë me një kontribut në rritjen ekonomike globale me 30% por sipas ekspertëve të ekonomisë pavarësisht kësaj Kina nuk ngelet e paprekshme nga krizat. Arben Malaj renditi disa pika që mund të përballet Kina në të ardhmen.
“Ekspertët e ekonomisë parashikojnë që edhe Kina do të përballet me disa probleme të cilat të gjithë shpresojmë që të jenë me një trajtim sa më pozitiv. Problemi i parë dhe kryesor do të jetë demografik, struktura demografike e cila mund të krijojë kosto të rënda buxhetore. Problemi i dytë do të jetë pabarazia dhe e treta që studiuesit theksojnë – a do të jetë përherë zhvillimi i Kinës një zhvillim ekonomik dhe social linear, apo do të ketë edhe ajo historitë e krizave që kanë kaluar vendet ën zhvillim.”
Në këtë simpozium u promovua edhe Libri i një ndër reformatorëve më të mëdhenj të Kinës Li yining mbi rrugën Kineze të reformave dhe zhvillimit ekonomik e përkthyer nga Sinologu, Iljaz Spahiu.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.