Zhvillimi i aktivitetit minerar – Plani 3-vjeçar/Qeveria planifikon rritjen e prodhimit deri në 5% në vit

Programi i veprimit 3-vjeçar 2022-2024 në sektorin minerar parashikon një rritje të produktit vjetor deri në 5% në vit, një shifër e njëjtë me planin e deritaniëshm. Këshilli i Ministrave ka miratuar dokumentin që orienton zhvillimin e sektorit për këtë periudhë, që ndër të tjera kërkon shfrytëzim racional të rezervave minerare dhe miradministrim të kësaj pasurie kombëtare.

Po ashtu, vendimi përcakton zhvillimin e veprimtarive minerare, duke përdorur teknologji bashkëkohore, që të parandalojnë dëmtimet mjedisore, shkarkimet në mjedis etj., mbrojtjen e jetës së njerëzve dhe mjedisit si dhe zhvillimin e këtij aktiviteti me ndikim minimal në panoramën dhe relievin. Ndërkaq, zonat minerare se ku parashikohet të hapen procedurat konkurruese nuk janë zbardhur ende, ndërkohë që ndryshe nga praktika e ndjekur në miartimin e planit paraardhës 2019-2021, projektvendimi nuk u nxorr për konsultim publik.

Kjo pasi në atë kohë drafti, i shoqëruar edhe nga plani konkret me zonat konkrete minerare dhe llojet e mineraleve u publikua paraprakisht, përpara se të merrte miratimin përfundimtra në qeveri.  Plani i kaluar parashikonte zhvillimin e sektorit minerar në nxjerrjen e gurit gëlqeror, gurit dekorativ dhe gurit gëlqeror të mermerizuar, me 68 zona, teksa nxjerrja e kromit përfshinte hapjen e procedurave për investitoret e interesuar në 5 zona minerare.

Ndërkaq, sipas programit të miratuar për 3-vjeçarin në vijim, zonat minerare, në të cilat është revokuar leja minerare apo mund të revokohet leja minerare për shkaqe ligjore, mund të shpallen si zona të reja konkurruese, pavarësisht se nuk janë përfshirë në programin 2022-2024.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.