Zhvillimi i Qëndrueshëm i Arsimit – Peleshi: Do të rrisim fondet për digjitalizimin e sistemit arsimor

Digjitalizimi edhe i sistemit arsimor është një nga projektet e qeverisë. Zv/kryeministri Niko Peleshi, gjatë prezantimit të objektivit për  Zhvillim të Qëndrueshëm të Arsimit 2030, është shprehur se kanë si qëllim që të rrisin fondet për këtë qëllim. Në të njëjtën kohë Peleshi ka theksuar edhe një herë rëndësinë që ka arsimi profesional  për rritjen e punësimit.

“Strategjia për zhvillimin e arsimit parauniversitar 2014-2020 ka si qëllim rritjen e fondeve për fuqizimin dhe përmirësimin e digjitalizimit në procesin e të nxënit. Kompetenca digjitale është një nga kompetencat kyçe, pjesë përbërëse e kornizës kurrikulare të Shqipërisë. Promovimi i arsimit profesional është pjesë përbërëse e strategjisë së qeverisë shqiptare për të kualifikuar të rinjtë, në përputhje me kërkesat e një tregu pune ndërkombëtar dhe dinamik. Arsimi profesional qëndron në thelb të përpjekjeve tona për të garantuar më shumë punësim dhe më shumë mirëqenie për të gjithë“, tha Peleshi.

Ministrja e Arsimit Lindita Nikolla ka theksuar se investimet në arsim janë bërë në bazë të prioriteteve. Duke mos anash kaluar dhe rëndësinë që kanë patur reformat në arsim të cilat kanë  sjellë ndryshime rrënjësore në sistemin arsimor.

“Investimet në infrastrukturë, jo vetëm kanë qenë të orientuara nga rendi prioritar, por investimet në infrastrukturë janë bërë në një cilësi të tillë për të mundësuar në shkolla edhe një aktivitet tjetër në kuadër të projektit tonë të madh për t’i kthyer shkollat në qendra komunitare. Angazhimi i qeverisë shqiptare është të rrisim fondet për arsimin parauniversitar, duke i afruar ato me vendet e rajonit dhe me mesataren e vendeve të OECD-së“, u shpreh Nikolla.

Arsimi 2030 ka si qëllim që të garantojë arsim cilësor gjithëpërfshirës dhe të barabartë. Raporti i Analizës së Politikës për Arsimin, është bazuar në tre çështje kryesore si :  zhvillimi dhe reforma e kurrikulës, teknologjitë e komunikimit në arsim si dhe politikat për mësuesit.

Rekomandimet që dalin prej tij kanë të bëjnë me zhvillimin e mëtejshëm profesional të mësim dhënies për zbatimin e kurrikulave në fusha të tilla si vlerësimi i studentëve , plotësimin e nevojave të studentëve nga shtresat në nevojë si dhe zhvillimin e teknologjive të informacionit për qëllime edukative.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.