Zhvillimi i raportimit financiar – Bankat kërkojnë të raportojnë vetëm me një standard
Sistemi bankar shqiptar kërkon nga Banka e Shqipërisë heqjen e raportimit financiar me dy standarde. Më konkretisht, bankat duan që raportimi të bëhet vetëm sipas standardeve ndërkombëtare të raportimit financiar, ndërsa të eliminohet raportimi paralel sipas kërkesave të përcaktuara nga Banka e Shqipërisë. Kjo kërkesë e bankave tregtare është përfshirë në platformën prej 10 pikash për rigjallërimin e kreditimit të ekonomisë.
Bankat argumentojnë se kalimi në standardin unik të raportimit, përveç konvergjencës, eliminon diferencat në mënyrën e evidentimit dhe raportimit të veprimtarisë së kreditimit dhe të provigjionimit të rrezikut të kredisë, duke përmirësuar transparencën dhe duke e bërë më të lehtë analizën dhe vendimmarrjen e lidhur me këtë veprimtari.
Bankat operojnë aktualisht mbi një procedurë të dyfishtë. Raportimi sipas Standardeve Ndërkombëtare të Raportimit Financiar (IFRS) është edhe standardi ligjor i përcaktuar për këtë kategori biznesi në ligjin për kontabilitetin dhe pasqyrat financiare. Gjithashtu, ky raportim është i domosdoshëm për konsolidimin financiar me grupin bankar zotërues, në rastet e bankave me kapital të huaj. Nga ana tjetër, bankat vazhdojnë të raportojnë edhe sipas standardeve të mbikëqyrjes, të përcaktuara nga Banka e Shqipërisë. Mes dy standardeve ekzistojnë ndryshime thelbësore, të lidhura sidomos me parimin e përllogaritjes së fondeve rezervë për humbjet nga huatë.
Për shkak të parimeve të ndryshme të ndjekura në provigjionim, dy standardet rezultojnë me diferenca të konsiderueshme në shpenzimet për këtë qëllim dhe, rrjedhimisht, edhe në rezultatin financiar të bankave. Gjithashtu, vlera e provigjioneve ka një ndikim të konsiderueshëm edhe në përmasën e portofolit të kredisë.
Portofoli i kredisë paraqitet në terma neto, duke zbritur nga vlera bruto provigjionet e llogaritura. Një vlerë më e lartë provigjionesh zvogëlon madhësinë neto të portofolit të kredisë dhe totalin e aktiveve të bankës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.