Zhvillimi i tregut të gazit natyror – ERE nis konsultimet për Kodin e Matjes, rregulla për regjistrimin e gazit

Enti Rregullator i Energjisë ka nisur procedurat për miratimin e “Kodit të Matjes së Gazit Natyror”, që është një prej dokumenteve më të rëndësishëm që do të rregullojë tregun e gazit në vend. “Kodi” është tërësia e normave minimale të detyrueshme për matjen dhe regjistrimin e gazit natyror. Ndërkohë që, përcakton kërkesat teknike të ndërtimit dhe shfrytëzimit të sistemit të matjes të gazit natyror, që do të jetë i përshtatshëm për matje, për mbledhjen e të dhënave, regjistrimin e tyre dhe zbatimin e procedurave përkatëse sipas rregullave të rregullt dhe Marrëveshjeve midis Palëve.

Miratimi i këtij dokumenti vjen në një kohë kur vendi ynë po ndërmerr një sërë projektesh për shfrytëzimin e Gazsjellësit Trans Adriatik, me qëllim përdorimin e gazit në funksion të industrisë dhe klientëve fundorë. Kjo edhe për faktin, se vetëm pak ditë më parë TAP njoftoi nisjen e operimit tregtar, duke transportuar gazin nga Azerbajxhani drejt tregjeve të Evropës. Paralelisht me Kodin e Matjes, tashmë ERE ka miratuar dhe Kodin e Rrjetit të Transmetimit të Gazit, që përcakton rregulla dhe procedura të sakta e transparente për tregtarët apo furnizuesit, që duan të rezervojnë dhe përdorin produktet e kapacitetit.

Më konkretisht, Kodi i Transmetimit, rregullon aksesin e palëve të treta në sistem, menaxhon alokimin e kapaciteteve kundrejt përdoruesve, përcakton strukturat tarifore, etj. Ndërkaq, përpara miratimit, drafti i Kodit të Matjes, do të konsultohet me të licencuarit në sektorin e gazit natyror si dhe gjithë palët e interesit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.