Zhvillimi i vaksinave mbështet naftën. Investitorët shpresojnë në rimëkëmbjen e kërkesës shumë shpejt
Nafta po qëndron në rritje në sesionin e sotëm, pasi investitorët shpresojnë në përmirësimin e kërkesës, falë testimeve pozitive të vaksinave kundër koronaavirusit. Megjithatë, fitimet po kufizohen nga vendosja e kufizimeve në lëvizje në shumë vende të botës. Një tjetër mbështetje çmimet po e gjejnë nga shpresat se OPEC dhe aleatët e tjerë me në krye Rusinë nuk do të rrisin prodhimi me 2 milionë fuçi, duke filluar nga janari, por do të vazhdojnë me marrëveshjen aktuale për uljen e prodhimit me 7.7 milionë fuçi në ditë. Nafta Brent e Londrës po tregtohet në mbi 45 dollarë për fuçi, ndërsa nafta Bruto amerikane po tregtohet në rreth 42.5 dollarë për fuçi. Të dyja kontratat u rritën me 5%, gjatë javës së kaluar. Ndërkohë, shefi i këshilltarëve shkencorë në SHBA, Dr. Moncef Slaoui, deklaroi se Administrata e Ushqimeve dhe Barnave me shumë mundësi do të japë miratimin në mes të dhjetorit, për shpërndarjen e vaksinës së zhvilluar nga Pfizer dhe BioNTech. Gjithashtu, OPEC+ do të takohet më 30 nëntor dhe 1 dhjetor për të përcaktuar politikat e prodhimit, në një kohë që janë rikthyer kufizimet në lëvizje. Analistët mendojnë se grupi i vendeve prodhuese do të shtyjë edhe me tre muaj marrëveshjen për uljen e prodhimit me 7.7 milionë fuçi në ditë, e cila skadon në fund të këtij viti. Por, kompanitë e vogla të naftës në Rusi planifikojnë të prodhojnë më shumë naftë, pavarësisht marrëveshjes globale për uljen e kuotave.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.