Zhvillohet Ministeriali Mbrojtjes – SHBA: Shqiptarët dhe amerikanët kanë qenë gjithmonë bashkë në kohë të vështira

Po zhvillohet ditën e sotme në Tiranë Ministeriali i Mbrojtjes së vendeve të A5 “Karta e Adriatikut”, gjatë të cilit ministrja e Mbrojtjes Olta Xhaçka u shpreh se roli i saj kryesor është fuqizimi i marrëdhënieve mes vendeve anëtare.

“Kjo nismë lidhet me angazhimin në një mision të përbashkët në Irak në kuadër të NATO-s ku Shqipëria do të luajë një rol drejtues. Roli i A5-sës ka qenë gjithmonë i lidhur ngushtë me promovimin e reformave në fushën e sigurisë dhe të mbrojtjes si një mënyrë për të çuar përpara procesin e anëtarësimit të disa prej vendeve anëtare në NATO”, u shpreh Xhaçka.

Sipas informacionit zyrtar të publikuar SHBA ishin të përfaqësuar nga zv.asistentja e Sekretarit të Mbrojtjes së SHBA, Laura Cooper, e cila tha se shqiptarët dhe amerikanët kanë qenë gjithmonë bashkë në kohë të vështira. Ajo vlerësoi gjithashtu kontributin pa kushte të të gjitha vendeve, të cilat reaguan menjëherë pas kësaj ngjarje.

”Të gjitha vendet që janë sot këtu, reaguan pa asnjë kusht dhe kanë dhënë mbështetjen e nevojshme për të ndihmuar Shqipërinë në këtë periudhë të vështirë. Shtetet e Bashkuara qëndrojnë  afër Shqipërisë dhe kanë partneritet me të gjitha vendet e rajonit. Kjo na sjell në këtë seancë të A5″, tha Cooper.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.