Zona e lirë ekonomike në Spitallë, KLSH: Të anulohet fituesi, komisioni ndryshoi renditjen
Kontrolli i Lartë i Shtetit ka kërkuar anulimin e menjëhershëm të shpalljes së fituesit në procedurën e konkurrimit të zhvilluar nga ish-Ministria e Zhvillimit Ekonomik, Turizmit, Tregtisë dhe Sipërmarrjes për zhvillimin e zonës ekonomike në Spitallë të Durrësit.
Kërkesa është bërë pas përfundimit të auditimit të kryer në datën 24 korrik 2017, sipas të cilit janë konstatuar një sërë shkeljesh të dispozitave ligjore e nënligjore në fuqi.
Më konkretisht, rezultoi se vlerësimet individuale, të kryera nga specialistët e fushës për kriteret respektive, nuk janë marrë në konsideratë nga Komisioni i Vlerësimit të Ofertave, duke ndryshuar padrejtësisht edhe rezultatin përfundimtar të operatorëve ekonomikë konkurrues.
Nga rivlerësimi i pikëve të bërë nga grupi i auditimit, rezultoi që komisioni duhet të kishte shpallur fitues për zhvillimin e zonës së lirë ekonomike ofertuesin tjetër.
Sipas KLSH renditja e padrejtë ka sjellë si pasojë: potencialisht 54 milionë Euro investime të munguara, 9,500 vende pune më pak, të ardhura të munguara në buxhetin e shtetit, nga mos realizimi i kontributeve për pagesën e sigurimeve shoqërore vetëm për 1 vit për shumën 718 milionë lekë si risqe të shtuara për ndotjen mjedisore, duke qenë se fituesi i shpallur parashikonte edhe ndërtimin e një fabrike ferrokromi, me impakt të lartë mjedisor.
Për të gjitha veprimet dhe mosveprimet, KLSH ka kallëzuar në Prokurori dhe anëtarët e Komisionit të Vlerësimit të Ofertave si dhe kërkon hetimin të mëtejshëm ndaj drejtuesve përgjegjës të niveleve më të larta të administratës.
Në datën 31 korrik, Ministria e Zhvillimit Ekonomik shpalli fitues bashkimin e përkohshëm të 3 operatorëve: ”Pelikan”, “The Best Construction” dhe “Vëllezërit Hysa” SHPK. Oferta e tyre u vlerësua në atë kohë me 71.2 pikë, duke lënë pas ofertën e Edil-Al-IT, e cila arriti të marrë 70.6 pikë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.