Zotimet e investimeve nga Kina në Ballkan krijojnë shqetësime në Bruksel
Në prag të samitit “16+1” për bashkëpunimin mes Kinës dhe vendeve të Europës Qendrore dhe Lindore në Sofje më 6 dhe 7 Korrik, shqetësime kanë nisur të krijohen mes radhëve të zyrtarëve në Bruksel.
Sipas diplomatëve europianë, takime të tilla rrëmbejnë resurse nga marrëdhëniet BE-Kinë. Samiti do të zhvillohet rreth 7 muaj pas të fundit në Budapest dhe kjo po shihet si një reagim i Kinës për të ushtruar më tepër presion.
Përmes investimeve, Kina shfaq një fokus të veçantë sidomos në vendet e Ballkanit që duan t’iu bashkohen BE-së. Nga marrëveshjet prej 9.4 miliardë dollarësh në dy vitet e fundit, mbi gjysma e tyre, 4.9 miliardë dollarë, përqendrohen në Bosnje dhe Hercegovinë, Serbi, Shqipëri, Malin e Zi dhe Maqedoni.
Sipas analistëve, janë ekonomitë më të vogla dhe më të dobëta të grupit që janë tërhequr më shumë nga graviteti i investimeve nën iniciativën “Një rrugë, një brez”.
“Iniciativa ka impaktin e saj më të madh në ekonomitë më të vogla dhe më me rrezik që u mungojnë alternativat e financimit për infrastrukturën. Kur oferta e Kinës është e vetmja në tryezë, ajo ka më shumë hapësirë për të arritur marrëveshje që kërkojnë përdorimin e kompanive kineze, punëtorëve nga Kina, etj.”, shprehet Jonathan Hillman, drejtor pranë Qendrës për Studime Ndërkombëtare dhe Strategjike.
Kontratat e infrastrukturës të Bashkimit Europian kërkojnë tendera konkurrues, ndërsa projektet nga bankat e Kinës e lidhin financimin me kushtin që kontraktorët kinezë të fitojnë procedurat e punës.
Premtimi i investimeve të tilla ka bërë që disa shtete europiane të mbështesin prioritetet diplomatike kineze. Megjithatë ka pasur edhe tensione mes Kinës dhe disa shteteve të grupit “16+1” për shkak të dështimit të realizimit të projekteve të premtuara.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.