Zvarritja e qëllimtë e gjyqeve, gjobë 50 mijë-100 mijë lekë! Publikohen në Fletoren Zyrtare ndryshimet e Procedurave Civile  

Ndryshimet ligjore në Kodin e Procedurave Civile pritet t’i japin zgjidhje problematikës së zvarritjes së proceseve gjyqësore. Ndryshimet janë publikuar në Fletoren Zyrtare e parashikohet të bëhen efektive për një periudhë 6 mujore. Një ndër ndryshimet që synon të frenojë mundësitë e abuzimit me procedurat e afatet ligjore është ajo që parashikon penalitete për ata që zvarrisin pa arsye proceset. Në raste të tilla, ligji parashikon gjoba në masën 50 mijë deri në 100 mijë lekë.

“Gjykata, në çdo shkallë të gjykimit, kur konstaton se palët ose përfaqësuesit e tyre me vetëdije paraqesin padi, ankime, kërkesa ose pretendime abuzive, ose të përsëritura dhe me keqdashje, ose kur kërkojnë qëllimisht të zvarrisin gjykimin, ose kur konstatohet se palët ose përfaqësuesit e tyre kanë fshehur ose shtrembëruar me keqbesim ose faj të rëndë, fakte dhe rrethana të rëndësishme që lidhen me çështjen, urdhëron me vendimin që jepet në përfundim të gjykimit, përveç kur në këtë Kod parashikohet ndryshe, gjobitjen e përgjegjësit në shumën nga 50 000 deri në 100 000 lekë. Kundër këtij vendimi lejohet ankim sipas rregullave për vendimet përfundimtare ose jopërfundimtare, në varësi të llojit të vendimit që i jep fund gjykimit përkatës” parashikohet në ndryshimin e Kodit të Procedurave Civile, raporton SCAN.

Nëse rezulton se pala që ka humbur gjyqin ka vepruar ose është mbrojtur në gjykim me keqbesim ose faj të rëndë, gjykata, me kërkesë të palës tjetër, e ngarkon atë përveçse me pagimin e shpenzimeve gjyqësore, edhe me shpërblimin e dëmit përkatës. Kërkesa për shpërblimin e dëmit paraqitet me shkrim nga pala e interesuar gjatë gjykimit në shkallë të parë, derisa nuk është deklaruar i mbyllur hetimi gjyqësor dhe i nënshtrohet ankimit dhe ekzekutimit sipas rregullave të përgjithshme.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.