Zvicra përballë Gjermanisë – Franga përbën diferencën mes 2 ekonomive që kanë shumë ngjashmëri

Rritja e ekonomisë zvicerane ecën në korrelacion pozitiv me atë të Gjermanisë, megjithatë, kjo e fundit ka gjasa ta tejkalojë përsëri.

Dy vite e gjysmë pas goditjes nga kursi i këmbimit, që i ka bërë eksportet më të shtrenjta, Zvicrës i mbetet ende që të rizbuloi aftësinë për të mbiperformuar Gjermaninë.

Vrulli i dobët i ekonomisë zvicerane do të jetë i dukshëm përsëri më vonë gjatë javës, ku do të publikohen të dhënat mbi Produktin e Brendshëm Bruto për tremujorin e parë.

Projeksionet qëndrojnë për një rritje me 0.5%, poshtë rritjes me 0.6% të Gjermanisë. Analistët thonë se një nga sfidat qëndron franga e fortë. Vrulli i ekonomisë zvicerane u ngadalësua kur franga u rrit kundër euros në 2015-ën, duke bërë që Banka Qendrore e vendit të heqë tavanin me valutën e përbashkët.

Fitimet e kompanive u zvogëluan dhe këto reaguan duke ulur kostot e inputit, shkurtuar vendet e punës e madje edhe me zhvendosjen e prodhimit jashtë vendit.

Një studim i Bankës Kombëtare të Zvicrës zbuloi se thuajse 40% e firmave e vlerësonin shfrytëzimin e kapacitetit të prodhimit poshtë normales.

Edhe pse Zvicra nuk është anëtare e Eurozonës dhe popullsia është sa 1/10-a e Gjermanisë, të dy ekonomitë kanë shumë të përbashkëta, përfshirë normën e ulët të papunësisë, specializim në prodhimin e produkteve me cilësi të lartë dhe një treg pronash të fortë.

Një diferencë e madhe mes vendeve është kursi i këmbimit, ndërkohë që franga ka qenë në vlerësim prej vitesh.

“Franga vazhdon të jetë e mbivlerësuar, inflacioni është i ulët, rritja ekonomike vazhdon e dobët dhe faktorët e prodhimit nuk janë shfrytëzuar plotësisht”, thotë presidenti i Bankës Qendrore, Thomas Jordan.

Përveç se ka prezantuar normën më të ulët të depozitave në botë prej -0.75%,  Banka e Zvicrës ka premtuar se do të vazhdojë të ndërhyjë në tregun e këmbimit valutor.

Fuqizimi i fundit i valutës europiane ka gjasa të sjellë lehtësi për Zvicrën, ndërkohë që Eurozona është destinacioni kryesor për eksportet.

Fondi Monetar Ndërkombëtar pret që ekonomia zvicerane të rritet me 1.4% këtë vit, poshtë rritjes me 1.6% për Gjermaninë.

Në 2018-ën,  Fondi pret që Zvicra ta mbiperformojë ekonominë më të madhe të Europës me 0.1%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.