Zvogëlohet rrjeti i bankave – Në një vit, u mbyllën 54 degë dhe agjenci
Ulja e numrit të bankave tregtare po sjell edhe një tkurrje të ndjeshme të pranisë së tyre në terren me degë dhe agjenci. Sipas të dhënave nga Shoqata Shqiptare e Bankave, në fund të marsit numri i degëve dhe agjencive zbriti në 425, nga 479 që kishte qenë në të njëjtën periudhë të vitit të kaluar.
Procesi i konsolidimit ka sjellë kështu mbylljen e 54 njësive të shërbimeve bankare brenda një viti. Zyrtarisht, numri i bankave ka zbritur në 14, nga 16 që ishte vitin e kaluar. Kjo erdhi si rezultat i shkrirjes së Veneto Banka me Intesa Sanpaolo dhe të NBG Bank me Bankën Amerikane të Investimeve. Këtë vit, konsolidimi do të vazhdojë më tej. Union Bank ka nisur procesin ligjor të përthithjes së Bankës Ndërkombëtare Tregtare, ndërsa Banka e Kreditit të Shqipërisë ka nisur procedurat e likuidimit. Si rezultat i këtyre zhvillimeve, numri i bankave pritet të ulet së shpejti në 12.
Zvogëlimi i rrjetit të bankave ishte një proces i pritshëm, për shkak të shitblerjeve, efekteve të krizës në strategjitë e bankave, por edhe rolit në rritje të digjitalizimit të shërbimeve bankare.
Edhe bankat që nuk janë prekur nga shitblerjet kanë vendosur të mbyllin ato degë që nuk rezultonin eficiente. Madje, banka të veçanta, si ProCredit, kanë mbyllur pjesën më të madhe të degëve fizike duke i zëvendësuar me hapësira të banking-ut dixhital, ku klientët vetë shërbehen.
Sidoqoftë, Shqipëria ngelet një nga vendet me numrin më të ulët të degëve bankare në raport me popullsinë. Aktualisht, numri i degëve ka zbritur në rreth 15 për 100 mijë banorë, ndjeshëm më pak krahasuar me vendet e tjera të rajonit. Ky raport fillon me 20 për 100 mijë banorë në Kosovë, deri në mbi 40 për 100 mijë banorë në Mal të Zi.
Ersuin Shehu/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.