Zyra kundër pastrimit të parave – Bankat do të kenë struktura të specializuara, “Vetting” e kontroll figure punonjësve

Bankat tregtare në vend do të kenë struktura të dedikuara për parandalimin e pastrimit të parave, do të kontrollojnë pastërtinë e figurës për punonjësit e përfshirë në këto struktura, të cilët do të trajnohen rregullisht. Banka e Shqipërisë ka miratuar disa ndryshime në Rregulloren “Për mbikëqyrjen e konsoliduar” në tregun bankar, duke shtuar një nen të ri me “Kërkesat mbi parandalimin e pastrimit të parave dhe financimit të terrorizmit”.

Ndryshimet përcaktojnë se bankat tashmë duhet të hartojnë programe kundër pastrimit të parave dhe financimit të terrorizmit në nivel grupi, të cilat duhet të jenë të zbatueshme dhe të përshtatshme për të gjithë subjektet e grupit. Programet e përcaktuara në pikën 1 të këtij neni, parashikojnë midis të tjerash: a) krijimin e strukturës së nevojshme nga institucioni mbizotërues në funksion të parandalimit të pastrimit të parave dhe financimit të terrorizmit në nivel grupi; b) kritere mbi  pastërtinë e figurës dhe integritetin e punonjësve, veçanërisht të atyre të përfshirë në procesin e parandalimit të pastrimit të parave dhe financimit të terrorizmit, të parashikuara në procedurat e brendshme të punësimit në nivel grupi; c) si dhe një program vjetor të trajnimit të punonjësve të subjekteve të grupit, lidhur me çështje të parandalimit të pastrimit të parave dhe financimit të terrorizmit.

Njëherësh bankat do ndërmarrin politika dhe procedura për shkëmbimin e informacionit të nevojshëm, në kuadër të ushtrimit të vigjilencës dhe të administrimit të rrezikut të pastrimit të parave dhe financimit të terrorizmit; e) paraqitjen e informacionit mbi klientët, llogaritë dhe transaksionet nga subjektet e grupit te funksioni i përputhshmërisë, i kontrollit të brendshëm dhe/ose i parandalimit të pastrimit të parave dhe financimit të terrorizmit në nivel grupi, kur ky informacion është i nevojshëm për qëllime të parandalimit të pastrimit të parave dhe financimit të terrorizmit; f) ashtu si dhe masa të mjaftueshme për ruajtjen e konfidencialitetit dhe përdorimin e informacionit të shkëmbyer.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.