Zyrtari i BE-së: Greqia ka nevojë për mbikëqyrje pas përfundimit të planit të shpëtimit
Një zyrtar i lartë i Bashkimit Europian ka hedhur dyshime mbi planet e Greqisë për një dalje të qartë nga programi i shpëtimit pas muajit gusht.
Në një intervistë për të përditshmen greke “Ta Nea”, Presidenti i Grupit të Punës së Eurogrupit, Hansen Vijlbrief, tha se Athina do të duhet të mbahet nën mbikëqyrje pas përfundimit të programit aktual.
Ai shtoi më tej se nëse Greqisë do t’i ofrohet lehtësimi i borxheve ose i atyre të kushtëzuara, do të ishte e natyrshme që kreditorët të duan të mbajnë një sy mbi ecurinë e reformave dhe të sigurohen se masat tashmë po zbatohen.
Vitet e para pas përfundimit të programit do të jenë edhe më të rëndësishme, tha ai, duke shtuar se mbikëqyrja e rreptë do të ishte e nevojshme për tu siguruar që Greqia do të ecë në rrugën e duhur.
Megjithatë, ai vuri në dukje se qeveria greke nuk dëshiron të ketë një linjë kreditore parandaluese pas programit të shpëtimit, edhe pse kreditorët e saj europianë janë të gatshëm të japin një të tillë, nëse kërkohet.
Athina ka deklaruar në mënyrë të përsëritur se është kundër një linjë kreditore parandaluese, e cila zakonisht shoqërohet me kushte strikte. Në vend të kësaj, ajo ka për qëllim krijimin e një rezerve të parave të gatshme deri në 19 miliardë euro me para të ngritura nga tregjet dhe kreditë e pashfrytëzuara, një shumë që mund të mbulojë nevojat e saj për më shumë se një vit, nëse është e nevojshme.
Qeveria e Greqisë është shprehur se do të paraqesë një plan të ri zhvillimi në takimin e ardhshëm të Eurogrupit që do të mbahet në 27 prill në Sofje.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.