“15.1 miliard lekë për blerje energjie në 2021” – Parashikimet e FSHU-së, nuk kërkon rritje të çmimit të energjisë

Furnizuesi i Shërbimit Universal, që është një prej kompanive të krijuara nga ndarja e OSHEE-së nuk kërkon rritje të çmimit të energjisë elektrike për vitin 2021. Sipas aplikimit të depozituar pranë Entit Rregullator të Energjisë, FSHU ka kërkuar të mbetet i pandryshuar çmimi mesatar i shitjes së energjisë elektrike për të gjithë kategoritë, përfshirë konsumatorët e lidhur në tensionin e mesëm dhe me matës në tensionin e ulët, si dhe për objektet e kultit apo bashkësitë fetare.

Mbajtja e pandryshuar e tarifave bazohet në parashikimet e treguesve ekonomikë për vitin 2021, ku ndër të tjera shoqëria parashikon një rënie të shpenzimeve për blerjen e energjisë elektrike. Sipas parashikimeve, në vitin 2021 do të shpenzohen rreth 15.1 mld lekë, nga 17.5 mld lekë që u shpenzuan gjatë vitit 2020. FSHU parashikon një rënie të çmimit mesatar me të cilin do të blihet energjia e nevojshme për plotësimin e nevojave konsumatore, nga 3.4 lekë/ kwh në vitin 2020, në 2.9 Lekë/Kwh në vitin 2021.

Ndërkaq, nga përllogaritjet rezulton se totali i të ardhurave të kërkuara per Furnizuesin Universal në vitin 2021 është 56,192 milion Leke me një ulje prej rreth 2.7 miliard Lekë ne krahasim me vitin 2020. Ulja e kostos planifikimit të energjisë së blerë per klientët e FSHU si rrjedhoje e furnizimit më te mire nga KESH është faktori kryesor i kësaj uljeje, duke arritur në 56.1 mld lekë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.