150 organizata, letër Ramës – “Ndaloni projektet e HEC-eve në Vjosë, të hartohet Plani i Menaxhimit të Basenit”
Rreth 150 organizata kombëtare dhe ndërkombëtare, i kanë dërguar një letër të hapur kryeministrit Edi Rama, ku i kërkojnë të ndalojnë menjëherë të gjitha projektet e hidrocentraleve në ujëmbledhësin e Vjosës. Në prag të Ditës Botërore të Lumenjve, që shënohet në datën 22 shtator, organizatat kërkojnë mbrojtjen e lumit të egër në Europë, deri në realizimin e Vlerësimit Strategjik Mjedisor dhe Planit të Integruar të Menaxhimit të Basenit, të cilët marrin në konsideratë aspektet sociale dhe në veçanti potencialin e zhvillimit të ekoturizmin.
“Zhvillimi i hidrocentraleve në Vjosë vazhdon të mbështetet nga Qeveria Shqiptare pavarësisht gjithë gjetjeve shkencore që konfirmojnë vlerën e ruajtjes së ekosistemit unik të lumit Vjosë”,-thuhet ndër të tjera në shkresë. “Qeveria Shqiptare mbështet zbatimin e hidrocentralit të Kalivaçit, pavarësisht faktit se institucionet ndërkombëtare, mes tyre Komisioni Evropian dhe Parlamenti Evropian, kanë kritikuar vazhdimisht këto zhvillime.
As rekomandimet e Konventës së Bernës për të pezulluar HEC-in e Kalivaçit deri në kryerjen e planifikimit të nevojshëm strategjik dhe vlerësimeve shtesë nuk janë respektuar nga qeveria shqiptare”,-vijohet më tej. Sipas organizatave, duke përfshirë hidrocentralin e Kalivaçit, 45 HEC-e janë të planifikuar në pjesën shqiptare të ujëmbledhësit të Vjosës: 8 në rrjedhën kryesore dhe 37 në degët e saj. Lumi Vjosa është një nga lumenjtë e fundit të mëdhenj të egër në Evropë, i cili rrjedh i pandërprerë në gjatësinë prej 200 km në territorin shqiptar. Ndërkohë që, kjo përbën potencial të lartë për zhvillimin alternativ të qëndrueshëm si ekoturizmi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.