3 prioritetet e operacionit kundër informalitetit. Ministrja: Kosto për bizneset që nuk zbatojnë ligjin, shumë me e kushtueshme se detyrimet

Ministria e Financave ka nisur zbatimin e Planit Operacional kundër informalitetit ku prioritet do të jetë kuponi tatimor, puna në të zezë dhe lëshimi i faturave.

“Sot evidentuam dy biznese të cilat përfaqësojnë një rast suksesi në zbatimin korrekt të ligjit mbi detyrimet tatimore. Gjatë vizitës shpreha angazhimin tim se do të jemi në krah të të gjithë atyre bizneseve të ndershme që zbatojnë me rigorozitet ligjin, duke mos lejuar konkurrencën e pandershme t’i dëmtojë” shprehet ministrja e Financave në një komunikim publik.

Ministrja deklaron se Administrata Tatimore është në terren për kryerjen e monitorimeve në bazë të analizës së riskut, “por asnjë subjekt që është në të drejtën e tij nuk ka arsye për t’u shqetësuar”.

“Plani operacional po ndërmerret në kuadër të luftës kundër informalitetit dhe, sikurse dhe Kryeministri i vendit u shpreh, kosto për bizneset që nuk zbatojnë ligjin do të rezultojë shumë më e kushtueshme në krahasim me detyrimet që lindin nga zbatimi i tij” shprehet ministrja.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.