40% më pak udhëtime në 2020-ën – Anketa e turizmit: Dominojnë udhëtimet e shkurtra. Tirana, më e preferuara
Pandemia ka reduktuar ndjeshëm udhëtimet e shqiptarëve për vitin 2020. Sipas Anketës së Turizmit “Pushime dhe Udhëtime”, të publikuar nga Instituti i Statistikave, vitin e kaluar u regjistruan rreth 40 % më pak udhëtime në të gjithë Shqipërinë dhe jashtë saj, krahasuar me vitin 2019.
Sipas INSTAT, përgjithësisht është shënuar rënie për të gjitha llojet e udhëtimeve, ndërkohë që rënia më e ulët është shënuar për udhëtimet për qëllime personale në Shqipëri. Megjithatë, udhëtimet e kryera brenda vendit për qëllime “Pushime dhe kohë të lirë” u rritën me 16,9 krahasuar me vitin 2019. Anketa nxjerr në pah gjithashtu, se sipas kohëzgjatjes së netëve të qëndrimit, dominojnë udhëtimet e shkurtra me 1-3 netë, që zënë 64.6% të totalit, ndërkohë që pjesa tjetër zihet nga udhëtimet e gjata më më shumë se 4 net.
Sipas anketës, në vitin 2020, destinacionet më të preferuara për udhëtime për qëllime personale apo biznesi në Shqipëri janë qarqet e Tiranës me 26,3%, Vlorës me 16,1 %, Durrësit me 14,0 % dhe Korçës me 8,9 %. Në udhëtimet e kryera jashtë Shqipërie përqindjet më larta janë regjistruar në: Greqi me 2,1 %, Kosovë me 2,0 % dhe Itali me 1,7 %.
Anketa e Turizmit në Familje, “Pushime dhe Udhëtime” është një vrojtim statistikor që kryhet pranë njësive ekonomike familjare dhe ka objekt të gjithë individët mbi 15 vjeç me vendbanim të zakonshëm në Shqipëri. Në vitin 2020 ajo u krye me një kampion prej 10.240 njësish ekonomike familjare, teksa në përfundim të vrojtimit u intervistuan rreth 7.537 NjEF të shpërndara në mënyrë uniforme në të gjithë territorin e Shqipërisë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.