41 Biss, izolohen të burgosurit VIP, Gjonaj: “Nën regjim të lartë sigurie 7 të dënuarit e parë. Kraja: “Kontakte me grupet”

Burgjet shqiptare kanë nisur aplikimin e sistemit 41 Biss, i cili parashikon masa të forta izolimi për të krerët e krimit që vijojnë kontaktet dhe aktivitetin kriminal edhe nga qelitë. Përmes një Konference të përbashkët për shtyp, Ministrja e Drejtësisë Etilda Gjonaj, Ministri i Brendshëm Sandër Lleshaj dhe Kreu i SPAK, Arben Kraja njoftuan se sistemi 41 Biss është aplikuar mbi 7 të burgosur.

“Ky është një regjim që po zbatohet për herë të parë bazuar mbi sistemin e suksesshëm Italian, përvoja e të cilit ka prodhuar rezultate të jashtëzakonshme kundër grupeve të organizuara kriminale apo grupeve mafioze. Subjektet për të cilat është marrë vendimi ti nënshtrohen këtij regjimi janë persona që janë akuzuar dhe dënuar për vepra të rënda dhe që janë vlerësuar nga administrimi dhe analizimi i informacioneve se paraqesin rrezikshmëri, pasi kanë mbajtur kontakte me organizatën kriminale ku bëjnë pjesë apo me të tjera.  ”

Ministri i Brendshëm Sandër Lleshaj e quajti këtë masë si shumë të rëndësishme në luftën kundër krimit të organizuar.

“Krahas goditjes të financave dhe aseteve kriminale edhe masat që po merren në kuadër të ligjit të njohur si 41 BISS shënon goditjen e shumëanshme të krimit, sepse vetëm një goditje e tillë e koordinuar do të jetë efektive dhe e suksesshme për ta luftuar atë dhe për të plotësuar pritshmëritë e qytetarëve. ”

Kreu i SPAK Arben Kraja tha se i ka kërkuar Ministrisë izolimin e 8 bosëve të krimit, ndërkohë që nënvizoi se shumë prej tyre vijojnë aktivitetin edhe pse gjenden në burg.

“Nga praktikat e mëparshme kemi pasur rastin që në qelitë e burgut personazhet e përfshira në krim të organizuar apo në nivele të larta menaxhojnë sistemet jashtë territorit të burgut duke kryer aktivitete kriminale dhe duke u bërë akoma më të rrezikshëm për shoqërinë. Në këtë mënyrë ndërhyrja me ligj dhe përgatitja e kuadrit ligjor ishte e domosdoshme.”

Shtatë emrat e parë të personave që do izolohen për një vit nën sistemin 41 Biss janë Arbjon Aliko, Emiljano Shullazi, Blerim Shullazi, Gilmando Dani, Endrit Qyqja, Genci Balla dhe Endrit Zela.

Lorenc Rabeta / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.