574 raste të reja me Covid-19, MSH: “Në 24 orë humbën jetën 6 qytetarë dhe u shëruan 578 të tjerë”
Gjatë 24 orëve të fundit vihet re një rritje e lehtë e infektimeve me Covid-19 në vendin tonë por gjithashtu janë rritur edhe testimet. Ministria e Shëndetësisë njofton se në total janë kryer 2,682 testime dhe kanë rezultuar pozitivë 574 qytetarë. 214 raste janë regjistruar në Tiranë, 41 në Lezhë, 23 raste në Elbasan dhe 21 raste në Lushnje.
Në 24 orët e fundit janë shëruar 578 qytetarë, duke e çuar numrin e të shëruarve 32,700 që nga fillimi i epidemisë.
Ndërkohë, edhe numri i të shtruarve në spitale vijon të jetë i qëndrueshëm. Aktualisht në 4 spitalet COVID po trajtohen 286 pacientë, 21 në terapi intensive, nga të cilët 5 janë të intubuar. Fatkeqësisht me gjithë përpjekjet e mjekëve, kanë humbur jetën 6 qytetarë. Ministria e Shëndetësisë u bën apel qytetarëve të respektojnë rregullat gjatë festave për të parandaluar përhapjen e COVID-19.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.