8.2% e tenderëve ankimohen në KPP – Myzyri: Bien kontestimet për sigurinë fizike, në 2021 ankesat do të dorëzohen online
8.2% e tenderëve të zhvilluar gjatë vitit 2020 u ankimuan nga operatorët ekonomikë pjesëmarrës në garë, ndërsa arsyet lidhen me kriteret e vendosur apo me parregullsi gjatë përzgjedhjes së fituesit nga Komisionet e Vlerësimit të Ofertave. Gjatë raportimit në Kuvend, kreu i KPP-së, Jonaid Myzyri bëri me dije të dhënat mbi ankimimet e procedurave të prokurimit publike, teksa theksoi se gjatë vitit që lamë pas u shënua një rënie e numrit të ankesave nga kompanitë e ruajtjes së sigurisë fizike.
Ndërkaq, gjatë vitit 2021 pritet të nisë funksionimi i sistemit të ri, që do të mundësojë dorëzimin e ankesave online nga ana e operatorëve ekonomikë, duke shmangur paraqitjen fizike.
Për vitin 2020, Agjencia e Blerjeve të Përqëndruara dhe Ministria e Shëndetësisë dhe Mbrojtjes Sociale ishin 2 institucionet ndaj të cilëve u depozituan më tepër ankesa nga operatorët ekonomikë për procedurat tenderues. Më konkretisht, ndaj Agjencisë së Blerjeve të Përqëndruara u depozituan në total 89 ankesa, ndërsa ndaj Ministrisë së Shëndetësisë 26 ankesa.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.