A do t’i mbyllë Shqipëria kufinjtë me Italinë për shkak të koronavirusit? Përgjigjia e Manastirliut

“Vendimet do të merren hap pas hapi”. Ka qenë kjo përgjigjia e ministres së Shëndetësisë Ogerta Manastirliu e pyetur nëse Shqipëria po planifikon të mbyllë kufinjtë me Italinë me qëllim parandalimin e mundësisë së përhapjes së kroonavirusit, sikurse kanë bërë disa vende të tjera.

“Kjo situatë po trajtohet me shumë përgjegjësi nga qeveria shqiptare dhe të gjitha strukturat.Të veprojmë në përgjegjësi të plotë duke garantuar pikë së pari shëndetin e qytetarëve. Shëndeti publik është i pari për ne. Edhe vendimet tona të orientuara drejt mbrojtjes. Ajo çfarë do të bëjmë do të jetë sipas shkallës së rrezikshmërisë dhe do të marrim masat përkatëse. Unë e thashë se nuk ka asnjë rast të prekur nga koronavirusi.

Do ta vlerësojmë hap pas hapi edhe marrjen e masave dhe vendimeve të tjera. Për çdo masë që do të marrim do të informohemi në kohë reale. Ne si Shqipëri jemi duke u konsultuar me OBSH-në në raport me të gjitha masat që kemi marrë deri më tani. OBSH rekomandon që të vlerësohet mundësia hap pas hapi por mbyllja e kufinjve realizohet në një moment të caktuar ku paraqiten raste apo kur kemi një situatë epidemie apo një situatë me përhapje të gjerë” tha Manastirliu.

Ndërkohë, deri më tani në aeroportin ndërkombëtar të Rinasit, ku u zhvillua edhe mbledhja e Task-Forcës së posaçme,  janë krijuar korsi të posaçme për pasagjerët që vijnë nga zona të prekura nga koronavirusi. Deri më tani janë 2803 pasagjerëve u është matur temperatura. Sipas përfaqëuesit tëTask-Forcës, ata “nuk kanë pasur probleme dhe shenja klinike dhe janë lënë të lirë që të vazhdojnë”

Në përgjigje të interesimit të SCAN për nevojat për maska që mund të ketë vendi, ministrja konfirmoi se tregu vendas i ka të gjtiha kapacitetet për të plotësuar çdo nevojë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.