Abuzimet me instrumentet matës/ Financat ulin gjobat, 30% më pak për shkeljet me sasinë e karburantit apo shishet!
Të gjithë subjektet që abuzojnë me enët dhe instrumentet matës do të gjobiten 30% më pak sesa aktualisht. Lehtësimi i gjobave parashikohet në projektligjin “Për metrologjinë”, i nxjerrë për konsultim publik nga Ministria e Financave dhe Ekonomisë. Objekt i kontrolleve nga drejtoria e Përgjithshme e Metrologjisë do të jenë të gjithë instrumentet matëse që përdoren në transanksionet tregtare dhe zyrtare, kujdesin shëndetësor, mbrojtjen e konsumatorit, mbrojtjen e mjedisit, rendin publik dhe sigurinë, produktet e parapaketuara dhe shishet, stacionet e tregtimit të karburanteve, rafiteritë e naftës, etj.
Ndërkaq, referuar draftit për subjektet e biznesit të vogël që kapen duke përdorur instrumentet matës që bien në kundërshtim me ligjin, gjoba do të jetë 20 000 lekë, për subjekte te biznesit të madh 100 000 lekë, ndërsa për stacione te tregtimit të karburanteve dhe njësitë e shitjes së lëndëve djegëse 100 000 lekë. Më e lartë masa administrative do të jetë për shoqëritë që kryejnë veprimtari kërkimi e prodhimi, për rafineritë, impiante te përpunimit të naftësjellësit, për instalimet dhe terminalet bregdetare dhe shoqëritë e tregtimit me shumicë, duke arritur në vlerën e 350 000 lekëve. Ndërkaq, ligji parashikon masa administrative edhe në rastet e mosmirëmbajtjes së rregullt të instrumenteve matës apo për prodhimin, importimin apo hedhjen në treg të shisheve apo enëve matëse, ndërkohë që vlera e tyre varion nga 10 mijë lekë në 400 mijë lekë.
Për shkeljet me instrumentet matës këto gjoba janë më të majme, duke variuar nga 70 mijë lekë për biznesin e vogël, 100 mijë lekë të biznesin e madh e deri në 2.5 milion lekë për impiantet e përpunimit të naftës. Në relacionin që shoqëron projektligjin, nuk ka asnjë shpjegim mbi arsyet që kanë çuar ministrinë të propozojë lehtësim të gjobave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.