Agrobiznesi në prag kolapsi, produktet e importit të subvencionuara konkurrojnë tregun, Basha: “3 propozime për të ndihmuar sektorin”
Kryetari i Partisë Demokratike ka bërë tre propozime që sektori i Agrobiznesit të përballojë krizën e shkaktuar nga COVID-19.
Këto propozime vijnë pas takimit të kreut të PD-së, Lulzim Basha, me presidentin e Këshillit të Agrobiznesit Shqiptar, Agim Rrapaj dhe drejtoreshën ekzekutive Enisa Shena. Kryedemokrati është informuar rreth pengesave të shumta që Agrobiznesi po përballet në operimin e produkteve bujqësore.
“Përfaqësuesit e 37 shoqatave kombëtare dhe rajonale, drejtues të Këshillit të Agrobiznesit, janë të shqetësuar për situatën aktuale pasi prodhuesit nuk arrijnë të shesin prodhimet dhe po konkurrohen nga produktet e importit të cilat vijnë të subvencionuara në vendet e origjinës.” – është shprehur Basha
Masat ekonomike të ndërmarra nga qeveria deri më tani, sipas z.Basha janë të pamjaftueshme, ndërkohë që për Agrobiznesin nuk ekziston ende një premtim për ndihmë shtetërore sipas tij.
Në këtë kuadër propozohen 3 zgjidhje nga kreu i PD-së, të cilat duhet të vihen në efekt në mënyrë urgjente, për të shpëtuar sektorin nga kolapsi:
1- Barazimin e TVSH-së për të ndihmuar prodhimin vendas dhe fermerët që kanë pësuar goditje nga pandemia duke ndihmuar të gjithë zinxhirin e prodhimit agro-ushqimor i vendit.
2 – Përfshirjen e institucioneve të mikrokredisë në skemën e garancisë sovrane që qeveria shqiptare ofron për bankat e nivelit të dytë. Sektori i mikrokreditit është jetik për të siguruar likuiditetin në sektorin agrobujqësor. Sot ky likuiditet mungon duke rrezikuar prodhimin.
3 – Qeveria shqiptare nëpërmjet AZHBR-së dhe institucioneve të tjera duhet të rrisë ndjeshëm financimin me grante për të gjithë fermerët shqiptarë të cilët kanë pësuar humbje nga situata e pandemisë COVID-19.
Nëse masat nuk merren në kohën e duhur, Lulzim Basha shprehet se pandemia shëndetësore e ditëve të sotme, mund të kthehet në pandemi ekonomike në të ardhmen e afërt.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.