Aksioni për disiplinimin e baxhove – AKU bllokon 95 kg djathë në Skrapar për tregtim të pasigurt

95 kilogram djathë i bardhë është bllokuar nga Autoriteti Kombëtar i ushqimit në fshatin Backë, Skrapar. Gjatë aksionit të AKU në vijim të masave të marra për disiplinimin e baxhove, ka rezultuar se djathi i butë tregtohej në mënyrë të pasigurt.

Subjekti në pronësi të shtetasit me iniciale Xh.R. ushtronte aktivitetin pa qenë i regjistruar në Qendrën Kombëtare të Biznesit. Sipas AKU, ambienti ku tregtohej produkti i bulmetit ishte tërësisht jashtë kushteve dhe standardeve të duhura si dhe mungonte dokumentacioni shoqërues për produktin si certifikata shëndetësore e lëndës së parë, analiza e ujit, plani DDD dhe dokumentacionet e tjera shoqëruese.

Krahas ndërprerjes së menjëhershme të aktivitetit të  subjektit, AKU ka vendosur ndaj tij edhe një gjobë me vlerë 300 000 lekë. Ndërkohë, bëhet me dije se rasti i subjektit do t’i dërgohet organeve të Krimit Ekonomik dhe Drejtorisë së Tatimeve të qarkut të Beratit për ndjekje të mëtejshme.

AKU u bën thirrje të gjithë konsumatorëve që të denoncojnë rastet e shkeljeve të sigurisë ushqimore si dhe të tregojnë kujdes në blerjen e produkteve të bulmetit në baxho të pa licencuara të cilat nuk plotësojnë standardet e sigurisë ushqimore.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.