Ankand me zbritje për 12 njësi shërbimi në rrethe – Enti Kombëtar i Banesave i nxjerr në shitje

Në fund të muajit Maj, Enti Kombëtar i Banesave do të zhvillojë sërish ankande për shitjen e një numri njësish shërbimi, të ndodhura në pallatet e ndërtuara me financimin e këtij institucioni.

Janë 12 njësi të tilla, të cilat mund të përdoren për biznese të ndryshme, si lokale, dyqane, furra buke, etj., të ndara 6 në qytetin e Fierit, 3 në Kavajë dhe 3 në Sarandë.

Shitja e këtyre njësive ka dështuar në ankandet paraardhëse (ankandi i parë daton në Gusht 2016), çka ka sjellë uljen e çmimit fillestar të ankandit për metër katror për secilën prej njësive.

Për njësitë në Fier, vlera e ankandit ka rënë nga 44,800 lekë/m2 në 39,200 lekë/m2. Për njësitë në Kavajë vlera fillestare është ulur nga 42,400 lekë/m2 në 37,100 lekë/m2. Ndërsa për njësitë në Sarandë vlera është ulur nga 560 euro/m2 në 490 euro/m2.

Ankandet për këto prona do të zhvillohen në datat 21, 22 dhe 25 Maj, ndërsa me shumë gjasa katalogut të pronave do t’i shtohen edhe 15 njësi shërbimi të tjera, të ndodhura në Berat, Librazhd, Lushnje dhe Korçë.

Ekzistenca e lokaleve në katin përdhe të këtyre pallateve, të cilat kanë banesa me kosto të ulët, i jep një dimension tregtar zonës, duke e bërë pjesën e rrugës më urbane dhe njerëzore.

Në pjesën më të madhe të njësive, cilësia e punime është mjaft e lartë, duke qenë të hidroizoluara, të shtruara me pllaka qeramike dhe të pajisura me rampa të veçanta.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.