AON: Dëmet nga tërmeti, mbi 1.1 miliard dollarë – Raporti global për katastrofat në 2019: Në Shqipëri, tërmeti më shkatërrues

Tërmeti i 26 Nëntorit rezulton të jetë jo vetëm ai më shkatërruesi në terma të humbjes së jetëve njerëzore por edhe ai me kostot më të mëdha në të gjithë globin përgjatë vitit të kaluar. Raporti i “AON” për katastrofat arrin në përfundimin se tërmeti i 26 nëntorit në vendin tonë e kalon shifrën e 1.1 miliardë dollarëve kosto, me mbi 14 mijë objekte të dëmtuara.

Për tërmetin e datës 21 shtator kostot vlerësohen në diçka më shumë se 45 milionë dollarë. Në nivel global ndërkohë katastrofat kanë shkaktuar një dëm prej 232 miliardë dollarësh përgjatë 2019-ës. Te katastrofat natyrore në raport klasifikohen të gjitha; që nga kushtet atmosferike, me përmbytjet, thatësirën, te tërmetet apo vullkanet e deri te pasojat ekstreme të ndryshimeve klimatike.

Si për ironi të fatit, 2019-ta nëpër botë ka qenë viti me më pak dëme nga tërmetet, si në jetë njerëzish ashtu edhe në ekonomi, që prej vitit 2000. Ndër katastrofat natyrore të 2019-ës më të kushtueshme se ajo e 26 nëntorit në vendin tonë, figurojnë përmbytjet në Itali, Francë, Austri dhe Spanjë, apo thatësira në Europën qendrore gjatë muajve të verës. Gjatë vizitës së tij në Itali, kryeministri Rama dha një shifër të përafërt për dëmet e tërmetit, në rreth 1 miliardë euro.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.