Bankat parashikojnë “bum” ndërtimi – “BEI”: Presin rritje drastike të kërkesës nga sektori dhe të kredive për shtëpi
Bankat që operojnë në Shqipëri presin një rritje drastike të kërkesës për kredi hipotekore, deri në masën 50%. Të dhënat dalin në pah nga anketa më e fundit për kreditimin në gjysmën e parë të vitit, e publikuar nga Banka Europiane e Investimeve, që është edhe organi zyrtar huadhënës i Bashkimit Europian.
Kjo anketë tregon se, bankat që operojnë në Shqipëri presin një rritje të ndjeshme të kërkesës për kredi për shtëpi, thuajse dy herë sa mesatarja europiane, siç ilustrohet edhe në grafik. Por nuk është ky segment i kreditimit që pritet të ketë rritjen më të madhe parë nga optika e bankave. Kreditimi i sektorit të ndërtimit sipas bankave do të rritet mbi 70%, ndërkohë që në 6 muajt e fundit vlerësohet të jetë rritur me rreth 24%.
Thuajse të gjithë segmentet dhe komponentët e kredisë parashikohen në rritje të ndjeshme gjatë 6 muajve të ardhshme nga sektori bankar që operon në vend, dhe ndërtimi duket se është shtysa kryesore. Një tjetër indicator, që tregon edhe faktorët që ndikojnë te kërkesa për kredi, i jep mbështetje të mëtejshme sektorit të ndërtimit. Ky indikator tregon se, në pjesën dërrmuese bankat janë të bindura se rritja e kërkesës merr shtysë nga perspektiva e tregut të shtëpive.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.