Basha apel qytetarëve: ”Raportoni menjëherë nëse keni ardhur nga Italia”

Për gjendjen e krijuar në vendin tonë, si pasojë e rritjes së numrit të të infektuar nga Covid-19 por nisur dhe nga konfirmimi i vdekjes së pacientes 73 vjeçare e cila ishte e prekur nga koronavirusi, ka reaguar kreu i Partisë Demokratike, Lulzim Basha, nëpërmjet një statusi në Facebook.

Ai i bën thirrje të gjithë qytetarëve të cilët kanë pasur një historik udhëtimi, të raportojnë menjëherë pasi vetëm kështu mund të ndihmojmë në ndalimin e përhapjes së virusit. Ndër të tjera ai ka theksuar se duhet të respektojmë të gjitha udhëzimet e dhëna nga Organizata Botërore e Shëndetësisë. Bashkëngjitur më këto udhëzime, kreu i Partisë Demokratike ka shprehur ngushëllimet familjarëve për humbjen e jetës së 73 vjeçares nga Durrësi.

Statusi i plotë

‘’Të dashur bashkëqytetarë,

Fatkeqësisht një zonjë humbi sot jetën nga virusi Covid 19. Ngushëllimet e mia për familjarët dhe të afërmit e saj, dhe uroj nga zemra shërim sa më të shpejtë për të prekurit e tjerë.

Ky moment duhet të na bëjë të gjithëve të reflektojmë. Rastet e qytetarëve të ardhur nga Italia dhe që janë mbartës te koronavirusit po shtohen. Kjo e bën shumë më të rëndësishëm rritjen e kujdesit, e, në veçanti, bashkëpunimin e gjithsecilit prej nesh me mjekët dhe stafin shëndetësor. Në të kundërt rrezikojmë veten, familjen, të afërmit dhe miqtë.

Bashkëpunoni me mjekët dhe jini transparentë, tregoni menjëhere nëse keni ardhur nga Italia, nese keni patur kontakte me persona në zonat e prekura nga virusi. Nuk është turp të prekesh nga koronavirusi, e rrezikshme për veten dhe të tjerët është ta mbash të fshehtë mundësinë e infektimit. Një pakujdesi e tillë rrezikon edhe infektimin e mjekëve e stafeve mjekësore.

E di se shumë prej jush që vini nga zona të prekura apo që keni qenë në kontakt me persona të prekur, e konsideroni të vështirë vetëizolimin për 14 ditë. Por vetëm kështu ju mund të ndihmoni veten dhe të tjerët.

Mjekët dhe stafi shëndetësor janë duke sakrifikuar shumë prandaj duhet t’i ndihmojmë me bashkëpunimin tonë.

Mos ngurroni të zbatoni këshillat e Organizatës Botërore të Shëndetësisë. Sa më të kujdesshëm dhe të përgjegjshëm të jemi, aq me më pak pasoja do ta kalojmë këtë situatë.’’

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.