Bashkëpunimi Shqipëri – Itali – Inaugurohet në Milano Dhoma e Tregtisë dhe Industrisë Shqiptare në Itali
Në Milano u inaugurua së fundmi Dhoma e Tregtisë dhe Industrisë Shqiptare në Itali. Kjo iniciativë lindi si rezultat i nevojës për të promovuar dhe mbështetur biznesin dhe investimet shqiptare në territorin italian si dhe biznesin dhe investimet italiane në territorin shqiptar.
Ndonëse ndërmjet dy vendeve tona rritet çdo ditë bashkëpunimi ndërmjet bizneseve, apo shtohen investimet reciproke, ka akoma më shumë interes dhe nevojë për bashkëpunim. Kreu i Dhomës së Tregtisë dhe Industrisë së Tiranës, Nikolin Jaka, u shpreh në ceremoninë e inaugurimit se, fluksi në rritje i bashkëpunimeve italo-shqiptare ka nevoje të orientohet drejt, të promovohet dhe të mbështetet në mënyrë institucionale nga një institucion serioz, i besueshëm dhe i aftë për të kryer këtë rol të rëndësishëm për komunitetet e bizneseve italiane dhe shqiptare.
Sipas tij, Dhoma e Tregtisë shqiptare në Itali do të bëhet shumë shpejt institucioni që presin me të drejtë dhe kanë shumë nevojë komunitetet tona të biznesit, investitorët respektivë, si dhe shumë qytetarë të tjerë që mund të mbështeten tek ajo për shërbime të ndryshme. Jaka shtoi se, Dhoma do të angazhohet me të gjitha forcat dhe kapacitetet për të mbrojtur interesat e të gjithë anëtarëve të saj dhe do të japë kontribut konkret në përmirësimin e klimës së biznesit dhe rritjes së nivelit të investimeve reciproke.
Dhoma jonë do të bashkëpunojë me strukturat përkatëse të administratave shtetërore të dy vendeve tona dhe me aktorët e tjerë të interesuar për të siguruar mbështetje reale dhe do të asistojë të gjithë anëtarët e Dhomës.
Në takimin për themelimin e Dhomës morën pjesë edhe Gianbattista Armeloni, presidenti i Enaip Lombardia dhe Pandeli Majko, ministër për diasporën shqiptare. Kjo ngjarje u shoqërua edhe me aktivitete kulturore artistike.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.