Bastet rritën të papunët me 40% – Mbyllja e bixhozit/ Shifra rekord, 521 përfitues në muaj të pagesës së papunësisë
Mbyllja e kazinove dhe basteve sportive bëri që se mesatarja vjetore e numrit te punëkërkuesve të papunë që përfitonin pagesë papunësie të rritej me 40% gjatë vitit që kaloi, krahasuar me një vit më parë. Sipas të dhënave zyrtare të Agjencisë Kombëtare për Punësim dhe Aftësi, të zbardhura nga RTV SCAN, gjatë 6- mujorit të parë të vitit 2019, fondi i pagesës së papunësisë u rrit si rezultat i mbylljes së kompanive të basteve, si dhe nga rritja e nivelit të pagës minimale në shkallë vendi. Në skemën e pagesës së papunësisë gjatë periudhës 12-mujore të vitit që lam pas kanë hyrë mesatarisht 521 përfitues çdo muaj, ku peshën specifike më të madhe e zënë personat që vijnë nga zvogëlimi i aktivitetit ose prishje e kontratave të punës.
Ndërkaq, sipas të dhënave të këtij institucioni, si rezultat i mbarimit të afatit të trajtimit, nga skema e pagesës së papunësisë kanë dalë mesatarisht 490 përfitues çdo muaj ose 85 % e totalit e mesatares mujore. Për shkak të këtyre zhvillimeve, në fund të vitit 2019 rezultoi se fondi i vënë në dispoziçion ishte i pamjaftueshëm, duke kërkuar kështu një shtesë prej 40 milion lekë mbi fondin e planifikuar.
Në total , nga skema e pagesës së papunësisë për periudhën 12-mujore janë punësuar 885 punëkërkues të papunë, ku peshën më të madhe e zënë zyrat rajonale të punësimit si; Tiranë, Vlorë, Elbasan dhe Korçë. Për vitin 2019 është shpenzuar 95% e fondit të rishikuar ose nga rreth 4.3 milion euro planifikuara janë shpenzuar rreth 4 milion euro. Numri i pjesëmarrësve në skemë është mesatarisht 2,870 persona.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.