BE, 103.3 mln euro për Shqipërinë. 26 mln euro do të shkojnë për të trajtuar pasojat e pandemisë
Komisioni Europian ka miratuar një paketë prej 103.3 milionë euro për të mbështetur Shqipërinë. Programi fokusohet në çështjet kryesore drejt anëtarësimit në Bashkimin Europian, si sundimi i ligjit, të drejtat themelore dhe qeverisja e mirë, ndërsa ofrohet edhe një ndihmë për përballimin e efekteve të krizës së Covid-19. Komisioneri i Bashkimit Europian për Fqinjësinë dhe Zgjerimin, Olivér Várhelyi, deklaroi se unioni vijon të mbështesë Shqipërinë. “Përballë krizës së Covid-19, ne kemi bërë disa rregullime të fondeve ekzistuese për të ndihmuar Shqipërinë t’i përballojë sfidat aktuale sociale dhe ekonomike. Njëkohësisht, fondet e BE synojnë të mbështesin reformat kyçe, që Shqipëria duhet të zbatojë për të ecur përpara në rrugën europiane”, shprehet Várhelyi. Ky program përfshin veprime për të forcuar shtetin e së drejtës dhe luftën kundër krimit të organizuar dhe korrupsionit, duke përmirësuar kapacitetin e Prokurorit Special për Antikorrupsionin, Byrosë Kombëtare të Hetimit dhe institucioneve të pavarura të drejtësisë. Gjithashtu, financime do të ketë edhe për zhvillimin e një tregu dinamik të tokës, përmes krijimit të një kornize të qartë të të drejtave të pronës. Programi do të funksionojë si në nivelin kombëtar ashtu edhe në atë lokal. Programi Vjetor i Veprimit 2020 për Shqipërinë përfshin 7 fusha:
BE për Qeverisjen e Mirë (€ 48.1 milionë)
Mbështetja e BE për pjesëmarrje në programet e unionit (€ 1.5 milionë)
Lehtësitë për Integtim në BE (€ 8.3 milionë)
BE për Sundimin e Ligjit (€5 milionë)
BE për të Drejtat e Pronës (€ 5.7 milionë)
Operacioni Ndërkombëtar i Monitorimit (IMO) Faza II (€ 8.7 milionë)
BE për Rimëkëmbjen Ekonomike (€ 26 milionë)
Pas shpërthimit të Covid-19, fondet ekzistuese të BE u riorientuan në objektivin e dyfishtë; për të ndihmuar Shqipërinë të sigurojë pajisje emergjente shëndetësore dhe të adresojë pasojat ekonomike dhe sociale të krizës. Në total, paketa e BE ndaj Covid-19 për Shqipërinë shkon në 50.65 milionë euro.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.