Berzh zgjat “vuajtjen” e ekonomisë – Këtë vit, rënia në 9%, vitin e ardhshëm ta harrojmë rimëkëmbjen

Banka Europiane për Rindërtim dhe Zhvillim (BERZH), institucioni më pesimist karshi recesionit të ekonomisë shqiptare si pasojë e pandemisë, ka shtuar edhe më tej dozat e pesimizmit. Në projeksionet më të fundit të rritjes ekonomike për vendet që banka mbulon, rezulton se për Shqipërinë, parashikimi për këtë vit mbetet i njëjtë, në -9%. Ky vijon të mbetet projeksioni më negativ ndër institucionet ndërkombëtare për vendin tonë. Por, lajmi i keq qëndron në faktin se për vitin e ardhshëm, BERZH ka rishikuar ndjeshëm projeksionet.

Ndërkohë që disa muaj më parë arsyetonte se në 2021-shin, rritja do të jetë në masën 12%, duke sinjalizuar një rimkëmëbje të plotë, tashmë BERZH flet për vetëm 4.5% rritje vitin e ardhshëm, çka tregon se rimëkëmbja do të dojë disa vite. Rindërtimi vlerësohet si motori i rritjes ekonomike vitin e ardhshëm. Së bashku me Malin e Zi, Shqipëria projektohet si vendi me impaktin më të madh të pandemisë, në termat e rritjes ekonomike, që është rrjedhojë e drejtpërdrejtë e varësisë së dy vendeve nga turizmi. Projeksionet nuk marrin parasysh një izolim të ri.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.