Bizneset kërkojnë më shumë kredi – Bankat presin rritje të mëtejshme në tremujorin e fundit
Bizneset rritën ndjeshëm kërkesën për kredi në tremujorin e tretë të vitit. Vrojtimi i aktivitetit kreditues, i kryer nga Banka e Shqipërisë, konfirmoi një përmirësim të kërkesës për financime në segmentin më të madh të tregut të huasë.
Bankat raportuan se zgjerimi i kërkesës për kredi në tremujorin e tretë u nxit kryesisht nga shtimi i nevojave për financimin e inventarëve, kapitalit qarkullues dhe të investimeve për rifinancimin e borxheve ekzistuese, si edhe për ristrukturimin e kompanive.
Në tremujorin e fundit të vitit 2019, bankat presin një shtim të mëtejshëm të kërkesës për kredi nga ana e bizneseve.
Vrojtimi i tremujorit të tretë përputhet me shifrat që tregojnë një ecuri më të mirë sasiore të kreditimit gjatë këtij viti. Sipas të dhënave nga Banka e Shqipërisë, portofoli i kredisë në fund të muajit gusht arriti vlerën e afro 561 miliardë lekëve, 5.2% më shumë krahasuar me gushtin e vitit të kaluar.
Portofoli i huasë bankare ka prekur vlerën më të lartë që nga nëntori i vitit 2014. Përcaktuese në rritjen e kredisë ka qenë kthesa në segmentin e biznesit, që ka një peshë specifike më të lartë, me 59% të portofolit total.
Kredia për sipërmarrjet private arriti në afro 332 miliardë lekë, në rritje vjetore me 3.2%. Veç rritjes së huadhënies së re, një ndikim të rëndësishëm ka pasur ulja graduale e efektit kredive të fshira nga bilancet.
Banka e Shqipërisë është optimiste se rritja e kredisë për ekonominë do të vazhdojë edhe më tej, e nxitur nga rritja e kërkesës së sektorit privat, normat e ulëta të interesit dhe ulja e raportit të kredive me probleme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.